Karlmaður á þrítugsaldri hefur verið ákærður fyrir tilraun til manndráps með því að hafa veist að öðrum manni í ágúst á þessu ári í bifreið á bílastæði fyrir utan Bónus á Nýbýlavegi. Stakk ákærði hinn manninn nokkrum sinnum með hníf í líkama og höfuð og sló hann nokkrum höggum með hnefa eða barefli í höfuð.
Í ákæru málsins kemur fram að sá sem fyrir árásinni varð hafi hlotið 8 sm langan skurð á vinstri kinn sem náði inn í vörina og 8-9 sm langan skurð hægra megin sem náði inn að eyra. Þá fékk hann einnig skurði á háls og brjóstkassa, auk þess sem andlitsbein brotnaði.
Af hálfu þess sem varð fyrir árásinni er farið fram á tvær milljónir í miskabætur vegna málsins, en saksóknari fer fram á að maðurinn verði dæmdur til refsingar. Er hann ákærður samkvæmt 211. grein almennra hegningarlaga, en þar segir að hver sem sviptir annan mann lífi, skuli sæta fangelsi ekki skemur en 5 ár, eða ævilangt. Er jafnframt vísað til 20. greinar sömu laga, en þar segir að hver sá sem hefur tekið ákvörðun um að vinna verk, sem refsing er lögð við í almennum hegningarlögum og ótvírætt sýnt þann ásetning í verki, hafi, þegar brotið er ekki fullkomnað, gerst sekur um tilraun til þess. Má dæma lægri refsingu þegar um tilraun er að ræða en ef brotið er fullframið.