Vél Icelandair á leið til Manchester frá Keflavík lenti í mikilli ókyrrð vegna stormsins Ciara sem gengur nú yfir Bretlandseyjar. Þurfti að snúa vélinni við og var henni lent í Glasgow.
RÚV greinir frá því að fljúga átti vélinni aftur til Íslands en farþegar um borð hafi neitað að fljúga aftur. Mikil geðshræring greip um sig meðal farþega þegar vélinni var lent, fólk grét og vildi ekki að vélinni yrði flogið að nýju til Íslands.
Farþegar vélarinnar eru núna komnir frá borði í Glasgow samkvæmt samfélagsmiðlum flugvallarins.
Samkvæmt Þorkeli Ágústssyni, verkfræðingi hjá rannsóknarnefnd samgönguslysa, hefur atvikið verið tekið til rannsóknar ásamt því að breska rannsóknarnefndin hafi verið upplýst um málið.
Veðurviðvaranir sem eru í gildi víða á Englandi og í Wales til klukkan 21 að staðartíma í kvöld kveða á um að brak og mikill öldugangur gæti ógnað lífi fólks fari það ekki varlega. Þá er almenn gul veðurviðvörun í gildi fyrir allt Bretland fram að miðnætti í kvöld. Vindhviður hafa sums staðar farið upp fyrir 42 metra á sekúndu.
Einn farþegi vélarinnar greinir frá upplifun sinni á Twitter. Segir hún flugmann vélarinnar hafa viljað fljúga aftur til Íslands til að koma vélinni þangað. Þá hafi hún aðgang að bifreið sem hún geti ekið aftur til Manchester og eigi það við um fleiri farþega.
Please @GLA_Airport open the doors to let us get off @Icelandair flight diverted from Manchester. After our terrifying #StormCiara journey, we are hungry, nauseous and in many cases scared. We need some air, space and access to food & drink.
— Emma J Thomas (@EmmaJThomas) February 9, 2020
Á Twitter-síðu Icelandair kemur fram að flugfélagið setji öryggi farþega og starfsmanna í forgang og sé allt gert til að tryggja það.
Hello Jack, Unfortunately due to storm Ciara we were forced to divert flight FI440 to Glasgow. Passenger and crew safety is our top priority, we will always take necessary action to ensure a safe travel experience. An email about accommodation compensation has been sent.
— Icelandair (@Icelandair) February 9, 2020