Innlent | mbl | 31.3.2020 | 13:36 | Uppfært 15:16

ÍE ætlar að hefja skimanir um allt land á næstu dögum

Kári Stefánsson, forstjóri Íslenskrar erfðagreiningar. Mynd/mbl.is

„Hugmyndin er sú að skima um allt land. Ætli við byrjum ekki í Vestmannaeyjum og á Austurlandi og svo á Norðurlandi. Við ætlum að senda pinna út á land til þeirra sem segjast geta tekið sýni, ætli það verði ekki á morgun eða hinn,“ segir Kári Stefánsson, forstjóri Íslenskrar erfðagreiningar, í samtali við mbl.is.

Skimun Íslenskrar erfðagreiningar fyrir kórónuveirunni í Turninum í Kópavogi stöðvaðist tímabundið þegar sýnatökupinnar voru farnir að vera af skornum skammti hér á landi en eftir að fleiri pinnar fundust á Landspítalanum og í ljós kom að pinnar frá Össuri reyndust nothæfir hófst skimunin á nýjan leik af fullum krafti.

Frétt af mbl.is

„Höfum nánast ekkert getað skimað“

Ekki er þó hægt að bóka tíma í skimun þar sem nú er verið að taka sýni úr fólki sem átti bókaðan tíma en komst ekki vegna skorts á pinnum. „Það verður hægt að opna fyrir bókanir aftur mjög fljótlega, þetta gengur eins og í sögu,“ tekur Kári fram og segir að fjöldi sem greinist með COVID-19 sjúkdóminn sé á bilinu 0,5 til 1% þeirra sem koma í sýnatöku.

Nú skiptir máli að skoða hvað veldur alvarlegum veikindum

Raðgreining á sýnum hélt þó áfram á meðan ekki var hægt að taka ný sýni og hafa þær sýnt fram á að minnsta kosti 40 stökkbreytingar á veirunni. Þá hefur að minnsta kosti einn einstaklingur greinst með tvö afbrigði af henni.

Frétt af mbl.is

Greindist með tvenns konar afbrigði veirunnar

„Það sem skiptir máli núna er ekki bara að sjá allan þennan fjölbreytileika í veirunni heldur að byrja að skoða hvort það eru einhver tengsl á milli breytileika í erfðamengi veirunnar og þess hvernig fólk fer út úr sjúkdómnum,“ segir Kári og útskýrir nánar:

„Sumir fá milt kvef en aðrir enda í öndunarvél. Spurning er hvað það er sem gerir það að verkum að menn fara svona misjafnlega út úr veirunni. Einn möguleiki er að það eigi rætur að rekja í mismunandi raðir í erfðamengi veirunnar og það búi til mismunandi svar fólks sem sýkist. Hinn möguleikinn er sá að það sé breytileiki í erfðamengi fólksins eða einhver samblanda af þessu tvennu.“