Áhöfnin á TF-GRO, þyrlu Landhelgisgæslunnar, hífði slasaða konu um borð rétt fyrir neðan Hvannadalshnjúk á áttunda tímanum í kvöld. Henni var svo komið undir læknishendur í Reykjavík.
Björgunarsveitir voru kallaðar út á sjötta tímanum í dag en konan, sem var á skíðum á jöklinum, hafði slasast. Tveir björgunarsveitarhópar frá Höfn í Hornafirði sinntu útkallinu en konan var að lokum hífð um borð í þyrluna.
TF-GRO lenti á Reykjavíkurflugvelli laust fyrir klukkan níu þar sem sjúkrabíll beið og flutti konuna á Landspítalann til aðhlynningar.