Starfshópur heilbrigðisráðherra sem falið var að leiða vinnu er varðar sýnatökur á Keflavíkurflugvelli undir stjórn Hildar Helgudóttur skilar tillögum til ráðherra í dag. Ákvörðun um birtingu tillagnanna verður svo tekin á morgun.
Þetta staðfestir Margrét Erlendsdóttir, upplýsingafulltrúi heilbrigðisráðuneytisins, í samtali við mbl.is.
Ásamt Hildi sátu í stjórn verkefnisins fulltrúar sóttvarnalæknis, ríkislögreglustjóra, ISAVIA, Landspítala og lögreglustjórans á Keflavíkurflugvelli. Yfirlögfræðingur heilbrigðisráðuneytisins verður starfsmaður verkefnastjórnarinnar.
Markmiðið er að sýni verði tekin úr öllum komufarþegum í Keflavík sem það kjósa fremur en að fara í sóttkví. Vottorð/rannsóknarniðurstaða frá öðrum löndum geti einnig komið í stað sóttkvíar, að því gefnu að sóttvarnalæknir meti vottorðið fullnægjandi. Hlutverk verkefnisstjórnarinnar verður einnig að greina hvaða kröfur þarf að gera til slíkra vottorða og hvernig þeim skuli framvísað og þau metin af hérlendum yfirvöldum.
Sýnatakan á að hefjast ekki síðar en 15. júní. Hún fer fram í tvær vikur og svo verður framhald framkvæmdarinnar metið.
Verkefnisstjórnin á einnig að gera tillögur um framkvæmd sýnatöku og greiningar hjá farþegum sem koma til landsins eftir öðrum leiðum en með flugi til Keflavíkur.