Starfsmenn Bækistöðvar Faxaflóahafna sóttu í gær eimreiðina Minør í geymslu og komu henni fyrir á sínum stað á Miðbakka við Gömlu höfnina í Reykjavík.
Yfirleitt er eimreiðin sett upp í kringum sumardaginn fyrsta en tafir hafa orðið í ár vegna framkvæmda við Miðbakka.
Eimreiðin er jafnan sett upp í kringum sumardaginn fyrsta og tekin niður í kringum fyrsta vetrardag. Eimreiðin Minør hefur alla tíð vakið áhuga barna og á seinni árum einnig erlendra ferðamanna, sem leggja leið sína á hafnarsvæðið.
Nú eru 103 ár liðin síðan eimreiðarnar Minør og Pioner luku verki sínu við gerð Gömlu hafnarinnar. Eimreiðin Minør hefur ávallt verið í vörslu Faxaflóahafna yfir vetrartímann en eimreiðin Pioner hefur verið varðveitt allt árið á Árbæjarsafni. Báðar voru eimreiðarnar framleiddar í Þýskalandi árið 1892.
Þær voru keyptar hingað til lands vegna hafnargerðarinnar á sínum tíma og fluttu grjót í hafnargarðana. Járnbraut var lögð frá Öskjuhlíð að Reykjavíkurhöfn og síðar einnig frá Skólavörðuholtinu. Fjöldi manns vann við grjóthögg á báðum stöðunum. Minør fór í sína fyrstu ferð 17. apríl 1913.