600 hagkvæmar leiguíbúðir í 15 sveitarfélögum

Sex hundruð hagkvæmar leiguíbúðir verða byggðar upp um land allt með stuðningi ríkisins. Heildarumfang framkvæmdanna er um 19,8 milljarðar króna, en þar af nemur framlag ríkisins um 3,6 milljörðum eða um 18%.

Allar íbúðirnar verða í eigu óhagnaðardrifinna leigufélaga en aðsópsmest er íbúðafélagið Bjarg, sem er sjálfseignarstofnun í eigu Alþýðusambandsins og BSRB.

Frétt af mbl.is

3,6 milljörðum úthlutað til hagkvæmra íbúða

Flestar íbúðirnar, eða 472, eru á höfuðborgarsvæðinu. Munar þar mestu um 166 námsmannaíbúðir sem félagið Grunnstoðir hyggst reisa á Nauthólsvegi en stofnkostnaður verksins er um 4,1 milljarður króna og er framlag ríkisins tæpar 740 milljónir. Þá verða 45 íbúðir byggðar í Vindási í Árbæ og er stofnvirði þeirra 1,48 milljarðar króna en framlag ríkisins nemur 265 milljónum.

Sautján íbúða nýbygging verður byggð við Maríugötu í Garðabæ og nemur stofnvirði fjárfestingarinnar 709 milljónum króna, en framlag ríkis 128 milljónir króna.

Af framkvæmdum utan höfuðborgarsvæðisins ber helst að nefna 1.100 milljóna nýbyggingu á Dalbraut á Akranesi, en þar nemur framlag ríkisins 198 milljónum króna. Íbúðirnar verða leigðar út á vegum Leigufélags aldraðra. Þá verða fjórar íbúðir reistar á Akreyri, við Keilusíðu og í Holta- og Hlíðahverfi, og tvær til viðbótar keyptar.

Framlag ríkisins er jafnan 18% af stofnvirði íbúða, en þó hærra í undantekningartilfellum á landsbyggðinni. Þannig nemur framlag ríkisins 34% af 319 milljóna fjárfestingu vegna uppbyggingar átta íbúða á Seyðisfirði og 32% af 112 milljóna uppbyggingu fjögurra íbúða á Bíldudal.

• Blogga um frétt