Einstaklingum sem sóttu um hæli hér á landi til Útlendingastofnunar fjölgaði umtalsvert í júnímánuði eftir að umsóknir höfðu nánast legið niðri í mánuðunum apríl og maí, þegar kórónuveirufaraldurinn stóð sem hæst.
Hælisleitendurnir voru frá níu þjóðlöndum samkvæmt tölum sem fengust hjá Útlendingastofnun.
Hælisleitendur sem sóttu um hæli á Íslandi í júní voru 19 talsins en þeir voru til samanburðar fjórir í maí og fimm í apríl.
Alls bárust fjórar umsóknir frá hælisleitendum í Írak í júní og fjórar frá Sómalíu. Þrjár umsóknir bárust frá ríkisborgurum í Venesúela, tvær frá Nígeríu, tvær frá Palestínu og ein umsókn frá hverju eftirtalinna landa; Ísrael, Íran, Sýrlandi og Afganistan.