Þórólfur Guðnason sóttvarnalæknir sendi heilbrigðisráðherra minnisblað í morgun varðandi áframhaldandi aðgerðir á landamærum og innanlands vegna kórónuveirufaraldursins. Hann leggur til að áfram verði skimað á landamærum en Íslensk erfðagreining hefur boðist til að aðstoða sýkla- og veirufræðideild Landspítalans við það.
Þetta kom fram í máli Þórólfs á upplýsingafundi almannavarna í dag.
Þórólfur sagði að ekki væri ástæða til að slaka á skimunum á landamærum og það eigi að halda þeim áfram til að lágmarka áhættuna á því að veiran berist hingað til lands. Farþegar frá Færeyjum, Grænlandi, Danmörku, Noregi, Finnlandi og Þýskalandi sleppa við skimun við landamærin eins og staðan er núna en aðrir eru skimaðir.
Mikið álag hefur verið á sýkla- og veirufræðideild Landspítalans vegna sýnatöku undanfarna daga en sýnafjöldi á landamærum hefur fjórum sinnum farið yfir 2.000 sýna mörkin.
„Íslensk erfðagreining hefur boðist til að taka hluta þessara sýna til að létta á Landspítalanum og ég býst við að þessu boði verði tekið,“ sagði Þórólfur.