Óhagstæð skipaskrá fælir frá

Það var gleðilegur dagur í sögu Íslands þegar nýr Dettifoss lagðist við bryggju 13. júlí sl., eftir langa heimför frá Kína. Glæsilegt skipið er hið stærsta sem hefur verið í þjónustu íslensks skipafélags og von er á systur þess á næsta ári.

Hins vegar brá mörgum í brún þegar í ljós kom að skipið siglir undir færeysku flaggi líkt og öll fragtskip Eimskipa.

Blaðamaður ræddi við Pál Ægi Pétursson, starfsmann hjá Félagi skipstjórnarmanna og fyrrverandi skipstjóra. Páll Ægir telur það undarlegt að flaggskip þjóðarinnar sigli undir erlendum fána og breytinga sé þar þörf. Hann rekur að í 20 ár hafi verið unnið að því að koma á fót íslenskri skipaskrá sem standist alþjóðlegan samanburð og samkeppnishæfni. Afrakstur þess voru lög um íslenska alþjóðlega skipaskrá, sem sett voru árið 2007 og skattalög sem sett voru árið 2011 en síðar afnumin.

Í umfjöllun um mál þetta í Morgunblaðinu í dag segir hann að á síðasta ári hafi „rykið verið dustað“ af þessu gamla máli og drög um verkefnaáætlun sett saman með það að marki að fjölga skráðum skipum hér á landi. Verkefninu stýri samgönguráðuneytið, en aðrir hagsmunaaðilar koma þar að, s.s. fjármálaráðuneyti, Samgöngustofa og fulltrúar verkalýðs- og skipafélaga