Vegna fjölgunar innlagna og vaxandi þunga í eftirliti Covid-19 göngudeildar hefur viðbúnaður á smitsjúkdómadeild A7 verið aukinn.
Alls eru 464 sjúklingar í eftirliti Covid-19-göngudeildar Landspítalans, að því er segir í tilkynningu.
Vegna röskunar á starfsemi Landspítala Fossvogi má búast við að fyrirhuguðum aðgerðum verði frestað. Gert er ráð fyrir skimunum fyrir Covid-19 hjá um 150 starfsmönnum í Fossvogi í dag.
Enn eru 35 starfsmenn Landspítalans í einangrun en þeim sem eru í sóttkví A hefur fækkað úr 184 í 177 frá því í gær.
Fjórir sjúklingar liggja inni vegna Covid-19, þar af einn á gjörgæslu, eins og áður hefur komið fram.