Losnað hefur um stærra svæði í kringum skriðusárið í Hleiðargarðsfjalli, ofan við bæinn Gilsá 2 í Eyjafirði, þar sem aurskriðan féll á þriðjudag.
Þetta sýna myndir Veðurstofunnar, en sérfræðingar á hennar vegum hafa áfram skoðað aðstæður í dag.
Skriðuhætta er sögð enn til staðar í fjallinu. Lítil hreyfing hafi verið í skriðusárinu í dag og lítið um að vatn, aur eða grjót hafi gengið fram.
Rýming mun áfram gilda á bæjunum Gilsá 1, Gilsá 2 og sumarbústað við Gilsá 2. Vegurinn um Eyjafjarðarbraut vestari hefur hins vegar verið opnaður fyrir umferð.
Ekki er útilokað að fleiri skriður geti fallið á svæðinu, að því er fram kemur í tilkynningu frá almannavarnadeild ríkislögreglustjóra. Staðan verði endurmetin á morgun.