Áslaug Arna Sigurbjörnsdóttir dómsmálaráðherra mun ræða stöðuna í kjaradeilu flugvirkja Landhelgisgæslunnar innan ríkisstjórnarinnar í dag.
Ekkert samkomulag náðist á fundi samninganefnda flugvirkja og ríkisins hjá ríkissáttasemjara í gær.
Flugvirkjar hjá Landhelgisgæslunni hafa verið í verkfalli frá 5. nóvember, en verkfallið hefur áhrif á þyrluflota gæslunnar. Engin þyrla verður tiltæk í hið minnsta tvo daga frá miðnætti á miðvikudag.
Áslaug sagði í samtali við mbl.is á föstudag, spurð hvort til greina kæmi að setja lög á verkfallið, að staðan væri í alvarlegri skoðun.