„Hann hringdi í mig fyrir þremur dögum en frá þeim tíma hef ég ekkert heyrt. Hann er bara einhvers staðar núna, en ég heyrði þegar hann hringdi að hann var alveg í lagi,“ segir Elínborg Jenný Ævarsdóttir, móðir Ævars Annels Valgarðssonar.
Hans hefur verið leitað frá því á föstudag þegar lögreglan á höfuðborgarsvæðinu lýsti eftir honum. Ekkert hefur spurst til hans frá þeim tíma. Talið er að hann hafi tengsl við óhugnanleg ofbeldismyndbönd sem birst hafa undanfarna daga. Myndböndin tengjast ýmist ofbeldi eða tilraunum til íkveikju með bensínsprengjum.
Aðspurð segir Elínborg að Ævar hafi ekkert gert af sér. „Ég veit að hann gerði þetta ekki. Hann kveikti ekki í þessu húsi. Hann hefur sagt mér það og ég trúi honum. Ég vona bara að lögreglan finni hann og þá getur hann komið í heimsókn,“ segir hún.
Í myndböndum sem hafa verið í dreifingu má sjá Ævar auk annars manns. Sá maður er þjálfaður bardagakappi, en lögreglan handtók hann nú fyrir skömmu. Elínborg kveðst ánægð með það. „Ég sá í blöðunum að hann er kominn í fangelsi. Maður er feginn að heyra það.“
Ævar er 174 cm á hæð, grannvaxinn og með dökkt hár. Þeir sem geta gefið upplýsingar um ferðir Ævars, eða vita hvar hann er niðurkominn, eru vinsamlegast beðnir um að hafa tafarlaust samband við lögregluna í síma 112.