Flugvirkjafélag Íslands og samninganefnd ríkisins (SNR) funda vegna kjarasamnings flugvirkja Landhelgisgæslunnar hjá ríkissáttasemjara í dag klukkan fjögur. Áætlað er að fundurinn standi til klukkan hálfsex.
Frá miðnætti verður þyrla landhelgisgæslunnar ekki til taks í að minnsta kosti tvo sólarhringa vegna verkfalls flugvirkjanna. Dómsmálaráðherra hefur áður sagt að ekki sé hægt að koma í veg fyrir það að þyrlan verði ekki til taks þar sem viðhaldsþörfin er orðin uppsöfnuð vegna yfirstandandi verkfalls.
Ýmsir, þar á meðal Landssamband slökkviliðs- og sjúkraflutningamanna og Sjómannafélag íslands, hafa lýst yfir áhyggjum sínum vegna þeirrar stöðu sem komin er upp vegna verkfallsins.