5,6 milljarða auknar endurgreiðslur

„Frá því að heimsfaraldur kórónuveiru hófst hafa verið endurgreiddir um 5,6 milljarðar króna aukalega af virðisaukaskatti (vsk) vegna margs konar framkvæmda en endurgreiðslurnar nýtast einkum einstaklingum og félögum á borð við sveitarfélög, almannaheillafélög og íþróttafélög.“

Þetta segir í tilkynningu fjármála- og efnahagsráðuneytisins frá í gær. Stuðningsfjárhæðirnar eru uppfærðar vikulega á sérstökum tölfræðivef yfir úrræði stjórnvalda vegna kórónuveirunnar. Fram kemur að undanfarið hafi „Covid-tengdar endurgreiðslur“ verið að jafnaði um 300 milljónir króna í hverri viku.

Rúmlega 40 þúsund afgreiddar umsóknir standa að baki þessum endurgreiðslum. „Þar af eru tæpar 27 þúsund vegna íbúðar- og frístundahúsnæðis, 13 þúsund vegna bíla, 100 frá almannaheillafélögum og 400 frá sveitarfélögum,“ segir í tilkynningu ráðuneytisins í Morgunblaðinu í dag.