„Þetta heldur bara áfram,“ segir Elísabet Pálmadóttir, náttúruvársérfræðingur á Veðurstofu Íslands, í samtali við mbl.is. Alls hafa um 650 jarðskjálftar mælst á Reykjanesskaga frá miðnætti.
„Það er þó minna um þrista og fjarka,“ segir Elísabet en klukkan 02:12 í nótt varð skjálfti af stærðinni 4,1 og fjórum mínútum síðar annar sem var 3,2 að stærð.
Rétt fyrir fjögur í nótt varð síðan annar skjálfti upp á 3,2. Upp úr klukkan 6 í morgun varð skjálfti sem mældist 3 stig.
Elísabet segir að skjálftarnir séu svipað margir og áður þótt þeir séu ekki jafn stórir.
Hún segir enn fremur að ekki sé óeðlilegt í svona hrinum að virknin minnki og taki sig síðan upp aftur. Sérfræðingar Veðurstofunnar funda með vísindaráði og almannavörnum í dag þar sem farið verður yfir þróun mála á Reykjanesskaga.