Ber brigður á skýringar ráðuneytisins um póstþjónustuna

Hörður Felix Harðarson hæstaréttarlögmaður telur að það fái ekki staðist, sem samgönguráðuneytið heldur fram, að ákvæði póstlaga um gjaldskrá alþjónustu sé „ekki að öllu leyti virkt“.

Umrædd málsgrein í póstlögunum kveður á um að gjaldskráin skuli taka mið af raunkostnaði við að veita þjónustuna að viðbættum hæfilegum hagnaði. En einkaaðilar halda því fram að Íslandspóstur niðurgreiði sendingar. Aðalfundur Íslandspósts fer fram í dag. 

Samgönguráðuneytið kveðst ekki vera í stöðu til að svara fyrir meintar niðurgreiðslur Íslandspósts á pakkasendingum út á land, eftir að landið varð að einu gjaldsvæði árið 2020.

Ráðuneytið bendir á að samkvæmt 2. mgr. 17. gr. laga um póstþjónustu skulu gjaldskrár fyrir alþjónustu vera þær sömu um allt land. Í ákvörðun Póst- og fjarskiptastofnunar nr. 1/2021, einkum kafla 3.6.4., sé að finna túlkun stofnunarinnar á umræddri lagagrein, s.s. markmiði og tilgangi hennar, m.a. með tilliti til byggða- og jafnræðissjónarmiða.

Samtök verslunar og þjónustu hafa sakað Póstinn um að niðurgreiða pakkasendingar út á land. Hefur lögmaður SVÞ sagt það fara gegn áðurnefndri 17. gr. póstlaga um að gjaldskrá fyrir alþjónustu skuli endurspegla raunkostnað að viðbættum hæfilegum hagnaði.