Loka svæði næst gossprungunni

Svæðið sem hefur nú verið lokað fyrir umferð er rauðmerkt …
Svæðið sem hefur nú verið lokað fyrir umferð er rauðmerkt á myndinni. Ljósmynd/Almannavarnir

Lögreglustjórinn á Suðurnesjum hefur ákveðið að loka svæði næst gossprungunni í Geldingadal, en sú ákvörðun er byggð á ályktun vísindaráðs um að stóri gígurinn geti brostið og hrauntaumurinn breytt hratt um stefnu. Þetta kemur fram í tilkynningu á Facebook-síðu almannavarna.

Jafnframt er bent á þá hættu að önnur gossprunga opnist í grennd við gíginn, en það gerðist í eldgosinu á Fimmvörðuhálsi árið 2010. Sjá má það svæði sem lokað verður á meðfylgjandi mynd.

Bendir lögreglustjórinn jafnframt á eftirfarandi atriði varðandi hættur sem kunna að skapast í kringum gosstöðvarnar.

  • Nýjar sprungur geta opnast í næsta nágrenni eldstöðvanna með engum fyrirvara.
  • Glóandi hraun getur fallið úr hraunjaðrinum og hröð og skyndileg framhlaup orðið þar sem nýjar hrauntungur brjótast fram úr hraunjaðrinum með miklum hraða sem erfitt er að forðast á hlaupum.
  • Gígarnir eru nú orðnir margra metra háir og geta verið óstöðugir, þeir geta brotnað og mikill og skyndilegur hraunstraumur úr þeim tekið nýja stefnu.
  • Sprengingar geta orðið þar sem hraun rennur yfir vatnsmettaðan jarðveg og þeytt hrauni til allra átta.
  • Hraunið rennur í lokaða dæld og geta lífshættulegar gastegundir safnast saman í dældum sem getur verið banvænt. Hættan eykst þegar vindur minnkar.

Að lokum er bent á að spáð sé vondu veðri næsta sólarhringinn og að ferðafólk þurfi að vera mjög vel útbúið ef það ætli sér að ganga að gosstöðvunum. Veðrið versnar talsvert í nótt með hvassviðri, slyddu eða snjókomu.

mbl.is
Fleira áhugavert
Fleira áhugavert