Ákveðið hefur verið að opna aftur fyrir umferð um Suðurstrandarveg að gosstöðvum í Geldingadölum á morgun, páskadag, 4. apríl kl. 12:00.
Vindátt fram að hádegi á morgun er ekki hagstæð með tilliti til gasmengunar en mun verða betri um hádegi, að því er fram kemur í tilkynningu frá lögreglustjóranum á Suðurnesjum.
„Veðurspá Veðurstofunnar gerir ráð fyrir norðan- og norðaustanátt, frost 3 til 7 stig. Þeir sem hyggjast leggja leið sína að gosstöðvunum eftir hádegi á morgun ættu að huga vel að klæðnaði því að það verður kalt og vindkæling töluverð í ofanálag,“ segir í tilkynningunni.
Bent er á að umferð sem nauðsynlega þurfi að fara um Suðurstrandarveg muni geta farið fram hjá lokunum.