Starfsemi SÁÁ verður óbreytt

„Framkvæmdastjórn SÁÁ hafði fyrst afspurn af máli Einars síðastliðinn föstudag og á fundi með Einari fékkst það staðfest og hann tilkynnti þá uppsögn sína,“ segir Anna Hildur Guðmundsdóttir stjórnarmaður SÁÁ í samtali við mbl.is.

Einar Hermannsson sagði af sér formennsku í SÁÁ fyrr í dag. Ástæðan er sú að hann svaraði auglýsingu á netinu fyrir nokkrum árum þar sem í boði var kynlíf gegn greiðslu. Sagði hann ljóst að umræða um það mál væri einungis til þess fallin að varpa rýrð á SÁÁ ef hann myndi áfram sitja sem formaður.

Frétt af mbl.is

Segir af sér formennsku í SÁÁ

Nýr formaður kosinn mjög fljótlega

Anna Hildur sagði stjórnina ekki hafa meira um málið að segja að svo stöddu en að boðað yrði til fundar í aðalstjórn SÁÁ mjög fljótlega. Þá verður nýr formaður kosinn.

Anna Hildur gegnir stöðu talsmanns stjórnarinnar meðan Sigurður Friðriksson varaformaður er í veikindaleyfi en Ásgerður Björnsdóttir, fjármálastjóri samtakanna, mun svara þeim vinnuerindum sem berast.

Aðspurð segir Anna Hildur að starfsemi SÁÁ og Vogs muni ekki skerðast í kjölfar tilkynningarinnar.

„Starfsemi samtakanna er óbreytt og það er mjög mikilvægt,“ segir Anna Hildur.

• Blogga um frétt