Loftrýmisgæsla ekki viðhöfð á Íslandi í apríl

Að öllu óbreyttu mun engin loftrýmisgæsla verða viðhöfð á Íslandi mestmegnis aprílmánaðar eftir að portúgalski flugherinn lýkur störfum sínum hér á landi í lok mars. 

Þetta staðfestir Ásgeir Erlendsson upplýsingafulltrúi Landhelgisgæslunnar í skriflegu svari við fyrirspurn mbl.is.

Portúgalski flugherinn kom hingað í lok janúarmánaðar og hefur annast loftrýmisgæslu Atlantshafsbandalagsins undanfarnar vikur. Er starfstími þeirra nú ríflega hálfnaður en Portúgalarnir munu ljúka sínu verkefni í lok mánaðar. 

Ítalski flugherinn mun síðan taka við loftrýmisgæslu hér á landi í lok apríl, að öllu breyttu, eða um mánuði síðar. 

Ekki verið viðvarandi loftrýmisgæsla frá 2006

Frá því að herinn fór árið 2006 hefur ekki verið viðvarandi loftrýmisgæsla hér á landi. Þess í stað er loftrýmisgæsla viðhöfð þrisvar sinnum á ári, nokkrar vikur í senn. 

Í samtali við mbl.is fyrr í vikunni sagði Þórdís Kolbrún R. Gylfadóttir utanríkisráðherra að ekki væri útilokað að einhverjar breytingar verði gerðar á loftrýmisgæslu á Íslandi í ljósi breyttrar heimsmyndar vegna stríðsins í Úkraínu.

Frétt af mbl.is

Útilokar ekki breytingar á loftrýmisgæslu

Hún sagði þörf á viðverandi loftrýmisgæslu þó ekki hafa verið tekin til formlegrar umræðu en henni þótti líklegt að endurskoðun á núverandi fyrirkomulagi yrði rætt.

„Það að varn­aráætlan­ir NATO, all­ar fimm, hafi verið virkjaðar fel­ur í sér mögu­leika á auk­inni viðverðu þannig að loft­rým­is­gæsla er eitt af því sem get­ur komið til umræðu. En það hafa eng­ar ákv­arðanir verið tekn­ar um breyt­ing­ar á því fyr­ir­komu­lagi sem hef­ur verið um ára­bil,“ sagði Þór­dís í sam­tali við mbl.is.

• Blogga um frétt