Edda Björk Arnardóttir, sem nam þrjá syni sína á brott frá suðurhluta Noregs í lok mars og flutti þá til Íslands, var handtekin á föstudaginn að beiðni norsku lögreglunnar. Farið var fram á að Edda yrði framseld til Noregs og jafnframt var farið fram á farbann yfir henni, sem var strax hafnað í héraðsdómi.
Í dag hafnaði ríkissaksóknari svo framsalsbeiðni norskra lögregluyfirvalda og féll einnig frá kæru til Landsréttar vegna kröfu um farbann. Þetta staðfestir Edda í samtali við mbl.is.
Hún segir íslensku lögregluna hafa staðið eins vel að málum og hægt var, en lögreglumenn hafi einfaldlega verið að framfylgja kröfu norskra lögregluyfirvalda.
Í kjölfar handtökunnar á föstudag fór Edda niður á lögreglustöð þar sem hún gaf skýrslu og svo fyrir dómara sem hafnaði kröfu um farbann.
Þess var krafist að Edda afplánaði sex mánaða dóm í Noregi sem hún fékk fyrir að halda börnum sínum eftir hér á landi í kjölfar vetrarfrís árið 2019, meðal annars vegna slæmrar tannheilsu þeirra. Edda hafði hins vegar fengi leyfi til að afplána dóminn hér á landi.
Faðir drengjanna, sem búsettur er í Noregi, hefur enn ekki höfðað innsetningarmál til að fara fram á að fá þá afhenta, líkt og búist var við að hann gerði. Edda segir hann augljóslega hafa sett það í forgang að eltast við hana og að reyna fá hana fyrir dóm í Noregi. „Það eina sem hann hefur áhuga er að ná mér, öll þessi orka fer í mig,“ segir Edda. Þetta snúist um hefnd af hans hálfu. Hann vilji ná sér niðri á henni.
Á föstudag var einnig tekin skýrsla af drengjunum þremur í Barnahúsi vegna kæru sem Edda lagði fram á hendur föðurnum vegna meints ofbeldis gegn þeim.
Samkvæmt heimildum mbl.is eru drengirnir, sem eru 11 ára og 8 ára, byrjaðir í skóla og tómstundum hér á landi. Heimildirnar herma að þeim líði vel og vilji ekki fara aftur til föður síns í Noregi.
Samkvæmt norskum dómsúrskurði má Edda aðeins hitta drengina undir eftirliti fjórum sinnum á ári, fjórar klukkustundir í senn og skal þá töluð norska. Faðirinn, sem einnig er íslenskur, fer einn með forsjá drengjanna og hafa þeir lögheimili hjá honum í Noregi.
Samkvæmt sama úrskurði eiga tvær alsystur drengjanna hins vegar að hafa lögheimili hjá móður sinni á Íslandi, þótt foreldrarnir fari sameiginlega með forsjá þeirra. Eldri stúlkan steig fram í hlaðvarpsþættinum Eigin konur í apríl og sakaði föður sinn um að hafa snert sig á óviðeigandi hátt.
Edda leigði einkaflugvél til að fljúga með syni sína til Íslands, en í ítarlegu viðtali við mbl.is skömmu síðar sagðist hún ekki hafa séð annan kost í stöðunni, enda taldi hún velferð barnanna ógnað, líkt og rakið er í viðtalinu.
Hún hafi verið orðin úrkula vonar um að dómstóll í Noregi tæki mark á þeim gögnum sem hún hefði lagt fram. Því hafi hún gripið til þess að örþrifaráðs að sækja synina til Noregs.