Atburðir sem þessir geta vakið óhug margra
Ragnhildur Þrastardóttir
Setja bókamerki
Nokkrir nágrannar mannsins sem lést í Barðavogi um helgina hafa fengið áfallahjálp frá Rauða krossinum. Talið er að karlmaður sem fæddur er árið 2001 hafi banað manninum en hann situr nú í gæsluvarðhaldi. Brynhildur Bolladóttir, upplýsingafulltrúi Rauða krossins segir að atburðir sem þessir geti „auðvitað vakið óhug margra“ og bendir hún fólki á Hjálparsímann 1717 og netspjallið á 1717.is ef það vill leita sér aðstoðar.
„Það voru nokkrir einstaklingar sem fengu að tala við fólkið okkar,“ segir Brynhildur.
Stundum þarf fólk meiri aðstoð
Hún segir að áfallahjálp byggist í grunninn á samræðum um það sem gerðist og hjálpar slíkt fólki mjög oft.
„Þetta er í rauninni bara samtal. Við erum með teymi í þessu sem hefur lært sálrænan stuðning. Áfallahjálp er í raun að tala um atburðinn, vita við hverju maður á að búast – sérstaklega ef maður hefur orðið vitni að erfiðum atburðum; vita hvernig er eðlilegt að líða eftir það og hvað er út fyrir einhver mörk,“ segir Brynhildur.
„Þegar maður verður vitni að einhverjum hræðilegum atburði líður manni illa. Það er eðlilegt. Ef það ástand varir mjög lengi þá eru ákveðnir hlutir sem fólk ætti kannski að líta eftir og leita sér faglegrar aðstoðar í kjölfarið. Í sumum tilvikum er alveg nóg að tala við einhvern í smá stund og þannig kemst fólk betur yfir áfallið. Í öðrum tilvikum þarf meiri faglega aðstoð.“
Samkvæmt heimildum mbl.is var maðurinn sem lést fæddur árið 1975 en karlmaður, fæddur árið 2001, er grunaður um að hafa orðið manninum að bana. Rannsókn málsins stendur yfir og miðar henni vel að sögn yfirlögregluþjóns. Ekki er útlit fyrir að grunaði maðurinn verði nafngreindur af lögreglu.
Eins og fram kom í frétt mbl.is í morgun standa dyr Laugarneskirkju opnar fyrir fólk sem vill leita sér áfallahjálpar vegna málsins.
Skiptir miklu meira máli en fólk grunar
„Hvílir mikil leynd yfir þessu öllu“
Vélsleðaslys: Þyrlan kölluð út á mesta forgangi
Verðbólgan komin niður í 6%
„Á réttri leið en nokkuð í land ennþá“
Skemmtiferðaskip hætt komið nærri Viðey