Vilja að kynjafræði verði skyldufag

Frá kvennafrídeginum 2016.
Frá kvennafrídeginum 2016. mbl.is/Árni Sæberg

Í skuggaskýrslu um framkvæmd Íslands á Kvennasáttmálanum benda félagasamtök á ýmislegt sem bætur mætti fara í starfi ríkis til að útrýma mismunun gagnvart konum. Hækka þurfi fjármagn fæðingarorlofssjóðs, gera kynjafræði að skyldufagi og innleiða Kvennasáttmálann í íslensk lög.

Kvenréttindafélag Íslands, Mannréttindaskrifstofa Íslands, Öfgar, UN Women á Íslandi og Öryrkjabandalag Íslands skiluðu skýrslunni inn fyrir fund nefndar sem starfar á grundvelli Kvennasáttmálans 2022. Framkvæmd Íslands á sáttmálanum verður tekin fyrir á fundi í Genf í febrúar árið 2023.

Í skuggaskýrslunni kemur meðal annars fram að:

  • Hækka þarf fjármagn fæðingarorlofssjóðs. Síðan fjármagn til sjóðsins var lækkað hefur hlutfall feðra sem taka fæðingarorlof einnig lækkað.
  • Samtökin hvetja stjórnvöld til þess að gera kynjafræði að skyldufagi á öllum stigum skólakerfisins.
  • Samtökin lýsa yfir áhyggjum yfir því að skortur á fjármagni kemur í veg fyrir að stjórnvöld geti sinnt skyldum sínum í jafnréttismálum. Má þar nefna að jafnréttisstofa hefur verið undirfjármögnuð til fjölda ára.
  • Samtökin lýsa einnig yfir áhyggjum þegar kemur að réttarkerfinu á Íslandi vegna lágs hlutfalls sakfellinga, hvernig gerendur geta beitt réttarkerfinu gegn þolendum sínum, langs málsmeðferðartíma, vægra refsinga og fyrningarfrests á kynferðisbrotum.
  • Samtökin hvetja stjórnvöld til þess að innleiða Kvennasáttmálann í íslensk lög.

Ísland undirritaði Kvennasáttmálann (e. CEDAW: Convention on the Elimination of All Forms of Discrimination Against Women) á kvennaráðstefnu Sameinuðu þjóðanna í Kaupmannahöfn 1980, en hann var fullgiltur af Alþingi 1985 eftir mikinn þrýsting frá kvennasamtökum. Samningurinn hefur þó ekki enn verið innleiddur í íslensk lög.

„Kvennasáttmálinn inniheldur 30 ákvæði og inngangsorð, sem eru grunnreglur um jafnrétti og áætlanir ríkja til að koma í veg fyrir mismunun gegn konum. Reglulega eru aðildarríki að sáttmálanum kölluð á fund nefndarinnar sem hefur eftirlit með því að aðgerðir þeirra, áætlanir eða lagasetningar samræmist Kvennasáttmálanum. Fyrir þessa athugun skila ríki inn formlegri skýrslu um framkvæmd á ákvæðum samningsins,“ segir í tilkynningu.

mbl.is
Fleira áhugavert
Fleira áhugavert