Björgunarsveitir á suðvesturhorni landsins voru kallaðar út laust fyrir klukkan fjögur að gosstöðvunum vegna göngufólks sem hafði villst á leið til og frá eldgosinu. Svartaþoka er í Meradölum og leiðinlegt veður en gosstöðvarnar hafa verið lokaðar frá því í gærmorgun. Þetta kemur fram í tilkynningu frá Landsbjörg.
Mbl.is greindi frá því fyrr í dag að nokkur fjöldi fólks hefði lagt leið sína að eldgosinu í Meradölum þrátt fyrir að búið væri að loka aðgengi. Engir viðbragðsaðilar voru uppi á Fagradalsfjalli.
„Á einhverju tímabili þá tókst fólki að komast inn á þessar gönguleiðir og er inni á svæðinu þar sem engir viðbragðsaðilar eru núna,“ sagði Gunnar Schram yfirlögregluþjónn í samtali við mbl.is fyrr í dag. Taldi hann flesta vera erlenda ferðamenn.