Ljós voru tendruð og þau lögð umhverfis hlaupabrautina við íþróttahúsið á Blönduósi í ljósaskiptunum. 

Fjölmennt var og fólk frá öðrum landshlutum gerði sér ferð til þess að vera viðstatt athöfnina. Tilgangurinn var að koma saman og sýna samhug með þeim sem eiga um sárt að binda um þessar mundir vegna voðaverksins í síðustu viku. 

Fallegt var en kalt í veðri þegar fólkið kom saman. Kertin voru í boði sveitarstjórnar, en svo mörg voru kveikt að þau komust ekki öll fyrir á hlaupabrautinni. Var þá brugðið á það ráð að teikna lítið hjarta innan í miðju brautarinnar. 

Fólkið myndaði svo hring og hélst í hendur.