Mikið framboð en salan hægari en áður

„Það er ekki eins mikið af uppseldum tónleikum nú og oft áður. Salan dreifist meira en það er mín tilfinning að svo komi kippur í desember,“ segir Hrefna Sif Jónsdóttir, framkvæmdastjóri Tix miðasölu.

Það styttist í jólin og tímabil jólatónleika rennur brátt upp. Síðustu ár, ef frá er skilinn versti covid-tíminn, hafa margir komið sér upp þeirri hefð að fara á jólatónleika. Framboðið er enda ótrúlegt og flest þekktasta tónlistarfólk landsins kemur fram á jólatónleikum nú sem endranær. Lausleg yfirferð Morgunblaðsins um vef Tix.is leiðir í ljós að 104 jólatónleikar eru í boði þetta árið. Þá eru aðeins teknir með þeir sem eru alfarið helgaðir jólatónlist en ekki bara haldnir í aðdraganda jóla.

„Framboðið er svipað og venjulega, alla vega eins og það var til dæmis 2019,“ segir Hrefna en árin fram að því hafði framboðið aukist frá ári til árs. Á þeim árum seldist enda oftast hratt upp á stóru jólatónleikana og því ekki skrítið að fleiri vildu vera um hituna. Salan nú fer hægar af stað en áður var.

Nánar í Morgunblaðinu.