Hussein fjölskyldan gat ekki fylgst með eigin réttarhöldum í máli Husseins Husseins gegn íslenska ríkinu í Héraðsdómi Reykjavíkur í dag vegna tæknilegra örðugleika með fjarfundarbúnað.
Mál Husseins vakti talsverða athygli í byrjun mánaðarins þegar lögreglan flutti hann og fjórtán aðra flóttamenn aftur til Grikklands þar sem fólkið hafði áður fengið alþjóðlega vernd. Hussein er í hjólastól og gagnrýndu meðal annars samtökin Þroskahjálp aðgerðinar.
Hussein Hussein gaf skýrslu frá Aþenu í Grikklandi í gegnum fjarfundarbúnað í upphafi aðalmeðferðar máls síns í dag. Sajjad og Yasameen Hussein, systkini Husseins báru einnig vitni með sama hætti.
Þegar komið var að þriðja og síðasta vitninu, Gerði Helgadóttur, heyrðist verulega lítið í henni í sal héraðsdóms og gat dómari illa skilið það sem hún sagði. Hún þurfti að segja kennitölu sína sex sinnum áður en það loks komst til skila.
Urðu þá tæknilegu örðugleikarnir til þess að Gerður þurfti að bera vitni í gegnum síma og ekki var notast meira við fjarfundarbúnaðinn.
Þrátt fyrir tæknileg vandamál náðu allir að koma fyrir rétti sem áttu að gera það, en Hussein fjölskyldan gat hins vegar ekki fengið að fylgjast eigin réttarhöldum þegar lögmenn beggja aðila fluttu málflutning sinn.
„Þetta er það sem ég óttaðist mest, að það yrðu einhverjir hnökrar eða erfiðleikar, en það gekk. Þetta er náttúrulega ekki það sama og ef þau væru í dómssalnum og gætu gefið skýrslu beint,“ segir Claudia Ashanie Wilson, lögmaður Husseins, í samtali við mbl.is.
„Eðli málsins samkvæmt vildu þau fylgjast með réttarhöldunum, en það var ekki hægt. Tæknileg vandamál voru til þess að það þurfti að slökkva.“