Skipulagsbreytingar hjá Sýn sem boðaðar voru í morgun hafa væg áhrif á miðla félagsins en einum starfsmanni fréttastofunnar hefur verið sagt upp. Þetta staðfestir Erla Björg Gunnarsdóttir, ritstjóri fréttastofu Stöðvar 2, Vísis og Bylgjunnar.
Eins og fram kom í morgun hefur stjórn Sýnar hf. samþykkt nýtt skipulag félagsins sem felur m.a. í sér að stöðugildum fækki í dag. Kostnaður vegna starfsloka nemur um 150 milljónum króna en ekki liggur fyrir hversu mörgum hefur verið sagt upp eða hvar þeir störfuðu innan fyrirtækisins.
Samkvæmt Erlu hefur skipulagsbreytingin lítil áhrif á miðlana en hún bætir þó við að alltaf sé erfitt að missa góða teymisfélaga úr hópnum.