Þórdís Sif Sigurðardóttir, bæjarstjóri Vesturbyggðar, segir að hús verði ekki rýmd vegna hættu á ofanflóðum á svæðinu, og að ekki sé talin ástæða til að lýsa yfir óvissustigi almannavarna.
Eins og fram kom í færslu Veðurstofunnar fyrr í dag segir að svipaðar veðuraðstæður séu nú uppi og á fimmtudaginn í síðustu viku þegar að krapaflóð féll í Geirseyrargili á Patreksfirði. „Núna virðist vera álíka mikill snjór eða ívið meiri í gilinu, og er ekki hægt að útiloka svipaðan atburð aftur,“ segir í færslunni.
Þórdís Sif var nýkomin af fundi með almannavörnum þegar að mbl.is náði tali af henni. Hún sagði að auknar varúðarráðstafanir verði viðhafðar í kringum gilið en að fólk sé almennt rólegt yfir þessu.
Krapaflóð féll á fimmtudaginn í síðustu viku á Patreksfjörð. Bæjarráð Vesturbyggðar skoraði í kjölfarið á auka fjárframlög til ofanflóðavarna og að allt sé gert til þess að draga úr ofanflóðahættu á byggðir og fjölfarna vegi innan Vesturbyggðar.
Þá var óskað eftir fundi með ofanflóðasjóði, ráðherra umhverfis-, orku- og loflagsmála, innviðaráðherra og forsætisráðherra.
Upplýsingafundur verður haldinn með íbúum og væri æskilegt að vera með fulltrúa ráðuneytanna á svæðinu, að mati bæjarstjórans.
„Þau verða að heyra í okkur til þess að við getum gefið þeim upplýsingar og okkar sýn á málið,“ segir Þórdís.
Verið er að teikna upp valkosti fyrir ofanflóðavarnir fyrir Patreksfjörð og Bíldudal. Áætlað er að framkvæmdir á ofanflóðavörnum við Geirseyrargil hefjist á næsta ári og ljúki árið 2028.
Ekki eru mörg hús undir á þessu svæði en að sögn Þórdísar er mikilvægt að tryggja öryggi íbúa og vill sveitarfélagið kanna hvort að hægt sé að flýta framkvæmdunum.