Vegna ótta við yfirvofandi bensínskort hafa tugir viðskiptavina Bílaleigu Flugleiða skipt bílum sínum út fyrir rafmagnsbíla. Þetta segir Sigfús Bjarni Sigfússon, forstjóri bílaleigunnar, í samtali við mbl.is.
Bílaleigan leigir gjarnan út bíla til fyrirtækja og ríkisstofnana en að sögn Sigfúsar óskuðu fyrirtæki eftir því að skipta yfir í rafbíla um leið og umræða um hugsanlegan bensínskort gerði við sig vart.
„Bara um leið og menn fundu fyrir því að það yrði einhver skortur, þá hringdu fyrirtækin og vildu skipta yfir í rafmagnsbíla.“
Segir hann dæmi um að fyrirtæki hafi skipt gervöllum vinnubílaflota sínum út fyrir rafbíla og mörg séu búin að óska eftir nýjum samningum.
„Við fundum greinilega fyrir aukningu í eftirspurn eftir rafmagnsbílum,“ segir hann og bætir við að hann hafi einnig tekið eftir því að nýir viðskiptavinir sýni meiri áhuga á rafbílum en áður fyrr.
Hins vegar segir hann að einstaklingar með bíla í langtímaleigu hjá þeim hafi ekki verið jafn virkir í orkuskiptunum, enda eru rafmagnsbílar oft dýrari í leigu en bensínbílar, en þó séu einhverjir sem hafa skipt yfir.