„Borgar sig ekki að leigja út húsnæði“

Sigurður segir takmarkanir á leigu í formi leigubremsu eða leiguþaks …
Sigurður segir takmarkanir á leigu í formi leigubremsu eða leiguþaks dragi úr framboði og viðhaldi verði ábótavant. Morgunblaðið/Sigurður Bogi

Sigurður Helgi Guðjónsson, formaður og framkvæmdastjóri Húseigendafélagsins, telur að leiguverð eigi inni hækkanir og leigubremsa sé ekki lausn þar sem framboð og eftirspurn eigi að ráða á leigumarkaði sem öðrum mörkuðum.

Sigurður telur að ákveðið gap sé á milli þess sem leigusali þarf að fá í leigu til þess að standast straum af kostnaði og þeirrar fjárhæðar sem leigjandi geti greitt, eina lausnin á því vandamáli sé aukið framboð húsnæðis.

„Það hreinlega borgar sig ekki að leigja út húsnæði þegar allur kostnaður er tekinn saman. Á sama tíma er leigan of há fyrir þann sem greiðir leigu af lágum launum,“ segir Sigurður og tekur undir orð Kára S. Friðrikssonar, hagfræðings hjá Húsnæðis- og mannvirkjastofnun, um að leiguverð hafi aldrei verið í lægra hlutfalli við fasteignaverð og sjaldan í lægra hlutfalli við laun.

Leigubremsa ekki lausn

Sigurður segir að takmarkanir á leigu í formi leigubremsu hafi mælst illa fyrir í öllum þeim löndum sem hann þekki til. Framboð hafi dregist saman og viðhaldi verið ábótavant.

„Þegar húsaleigulögin frá 1979 voru sett þá voru þar mjög hörð ákvæði í garð leigusala sem höfðu þær afleiðingar að húsnæði hvarf út af markaðnum. Aukið framboð er það eina sem getur lagað þetta ástand en strangar reglur sem setja frekari hömlur á leigusala hafa verið nægjanlega miklar,“ segir Sigurður og bætir við að það væri hentugt ef umræða um verðbremsu væri til að mynda sett á bensín og matvæli.

„Það að framboð og eftirspurn ráði gildir öllu og velti ég því oft fyrir mér af hverju mönnum dettur einungis í hug að setja bremsu á leigu. Ef það er svona góð hugmynd ætti að vera sett bremsa á fasteignaverð, rekstur bíla og matarkörfuna en þar er framboð og eftirspurn látið ráða för,“ segir Sigurður.

Skattfrjáls leiga möguleiki

Stærsti hluti íbúðarhúsnæðis á leigumarkaði er húsnæði í eigu einkaaðila. Sigurður telur að með því að gera leigu skattfrjálsa myndi meira húsnæði koma út á markaðinn og forsendur yrðu til þess að lækka leigu jafnvel þótt um tímabundið úrræði væri að ræða.

„U.þ.b. 65% leiguhúsnæðis er í eigu einstaklinga sem leigja út íbúðina sína því þeir þurfa ekki á henni að halda í einhvern ákveðinn tíma. Ég tel að ef leiga yrði gerð skattfrjáls til t.d. tveggja ára myndi meira húsnæði koma út á markaðinn og til dæmis húsnæði sem nú er í Airbnb leigu,“ segir Sigurður.

mbl.is
Fleira áhugavert
Fleira áhugavert