Ók töluvert yfir hámarkshraða fram úr röð bifreiða

Árekstur árið 2021 sem leiddi til andláts ökumanns Toyota Land Cruiser-bifreiðar, má rekja til þess að ökumaður Volvo-fólksbifreiðar gekk ekki úr skugga um að öruggt væri að taka fram úr gagnvart annarri umferð.

Ók ökumaður fólksbifreiðarinnar töluvert yfir hámarkshraða fram úr röð bifreiða á Suðurlandsvegi á vinstri akrein og framan á Toyota-jeppann, með þeim afleiðingum að ökumaður jeppans lést hálfum mánuði eftir slysið og farþegi í bílnum slasaðist alvarlega.

Frétt af mbl.is

Þrír fluttir á slysadeild eftir umferðarslys

Ökumaður Volvo bifreiðarinnar var á 127 km/klst hraða þremur sekúndum áður en slysið varð og slasaðist hann lítillega. Ökumaðurinn er sagður hafa haft litla reynslu af akstri.

Þetta kemur fram í skýrslu rannsóknarnefndar samgönguslysa. 

Hafnaði í skurði

Slysið varð 20. desember árið 2021 á Suðurlandsvegi um 1,2 kílómetra austan við Þingborg í Árnessýslu. Hálka var á veginum og skyggni skert vegna hrímþoku.

Í skýrslunni segir að hálkan hafi sennilega haft áhrif á beygju- og hemlunargetu Volvo-bifreiðarinnar.

Jeppanum var ekið til austurs en auk ökumanns var einn farþegi í bílnum. Fólksbifreiðinni var ekið til vesturs og var ökumaðurinn sá eini í bílnum.

Var ökumaður Volvo-bifreiðarinnar að taka fram úr þremur ökutækjum, vöruflutningabifreið með tengivagn, fólksbifreið og pallbifreið með kerru. Var bíllinn því á gagnstæðum vegarhelmingi á töluverðum hraða þegar að slysið verður.

Rekast vinstri framhorn bifreiðanna saman með þeim afleiðingum að jeppinn valt á hægri hliðina og rann um 10 metra í suður útaf veginum. Fólksbifreiðin hafnaði 55 metra til vesturs frá slysstað, á hvolfi í skurði.

Þá urðu tveir bílar til viðbótar fyrir skemmdum þegar brak út bifreiðunum lentu á þeim.

Ber ekki saman

Vitni segjast hafa verið meðvituð um að árekstur væri yfirvofandi en að ökumaður Volvo bifreiðarinnar hafi ekki nýtt sér mögulegt pláss til að fara inn á réttan vegarhelming á milli þeirra bifreiða sem hann ók fram úr. Gott bil hafi verið á milli og hafði hann tvívegis þann möguleika.  

Ökumaður Volvo-bifreiðarinnar var þó ekki sammála þeim vitnisburði og sagði að ekki hafi verið nógu mikið bil milli bíla. Þá hafi hann ekki séð Toyota bifreiðina.

Ökuhraði yfir hámarkshraða

Bíltækni rannsókn leiddi í ljós að hraði Volvo bifreiðarinnar hafi aukist töluvert rétt fyrir slysið. Þannig var hraðinn, samkvæmt aflestri tölvu bílsins, 108 km/klst og inngjöfin 100% fimm sekúndum fyrir slysið.

Þremur sekúndum fyrir slysið var hraðinn aftur á móti orðinn 127 km/klst og inngjöfin 91%.

Sekúndu síðar virkjaðist stöðugleikakerfi fólksbifreiðarinnar og einni sekúndu fyrir slysið vísar stýri 47% í beygju til hægri, hemlun hófst og ABS-hemlakerfi virkjaðist.

Samkvæmt aflestri úr tölvu Volvo-bifreiðarinnar var hraði bifreiðarinnar 114 km/klst er áreksturinn varð.

Ekki er vitað fyrir víst á hvaða hraða Toyota jeppinn var á þar sem tölvubúnaðurinn bauð ekki upp á aflestur af hraða. Vitni segja hins vegar að bifreiðinni hafi verið ekið á um 75-80 km/klst hraða skömmu fyrir slysið.

• Blogga um frétt