„Hvað gerum við núna? Við bíðum og sjáum,“ segir Magnús Tumi Guðmundsson, jarðfræðingur hjá Háskóla Íslands. Hann segir ástæðuna fyrir að ekki sé öruggt fyrir íbúa að vera í Grindavík vera að ekki sé hægt að útiloka neitt.
Þetta kom fram á upplýsingafundi almannavarna í hádeginu.
Hann segir líkur á gosi út á grunnsævinu út af Reykjanesi ekki líklegt, en ef til þess kæmi gæti það orðið eins og Surtseyjargosið. Í heildina yrði það ekki mjög stórt gos.
Magnús segir að ákafi í upphafi gæti orðið sambærilegur við gosið í Holuhrauni 2015 og ef slíkt kæmi til þyrfti að hafa miklar gætur á gasmengun og taka það alvarlega.
Jafnframt þurfi að takmarka aðgengi fólks að svæðinu meðan slíkt ætti sér stað. Að öllum líkindum yrði slíkur atburður mun skammvinnari miðað við stærðir gosa á skaganum.
Ef sprunga opnist á svæðinu gæti hún orðið allt að 8 km að lengd, að sögn Magnús Tumi en vísar til Kröfluelda þar sem slíkar sprungur opnuðust en einangruðu sig síðan. Líkur séu því á að slíkt hið sama myndi gerast á skaganum.
Út frá rannsóknum á gosum á Reykjanesskaganum sé hins vegar ekki líklegt að kvikustrókahæð á svæðinu verði mikil, en hann kveðst frekar hafa áhyggjur af hrauni.