Annað árið í röð bar Marlena Radziszewska sigur úr býtum í bakgarðshlaupi Náttúruhlaupa sem fram fór í Heiðmörk um helgina.
Vísir greinir frá þessu en Marlena var ein eftir þegar hún hafði hlaupið 38 hringi eða 254,6 kílómetra en hlaupið hófst á laugardagsmorgun og því lauk á tólfta tímanum í gærkvöld. Marlena hljóp jafnmarga hringi og þegar hún sigraði í bakgarðshlaupinu á síðasta ári. Þórdís Ólöf Jónsdóttir varð önnur en hún lauk keppni á 38. hringnum.
230 hlauparar hófu keppni á laugardagsmorgun en bakgarðshlaupið virkar þannig að á hverjum klukkutíma hlaupa keppendur 6,7 kílómetra. Hver hringur er ræstur út á heila tímanum og ef keppandi er kominn í mark áður en að næsti hringur byrjar má hann nota það sem eftir er af tímanum til að hvílast og undirbúa sig fyrir næsta hring.