Þrír karlar og ein kona voru í dag úrskurðuð í gæsluvarðhald í Héraðsdómi Reykjavíkur til föstudagsins 27. september vegna rannsóknar á innbrotum.
Fjórmenningarnir voru handteknir á höfuðborgarsvæðinu og Keflavíkurflugvelli en þrír til viðbótar eru jafnframt í haldi lögreglu vegna málsins.
Þetta kemur fram í tilkynningu lögreglu.
Einstaklingarnir sjö eru erlendir ríkisborgarar en lögregla hefur ekki tekið ákvörðun um hvort embættið fari fram á gæsluvarðhald yfir þremenningunum sem eru í haldi.
Rannsóknin er sögð umfangsmikil. Lögregla hefur gert húsleitir og lagt hald á tvö ökutæki.
Í tilkynningunni segir að um sé að ræða innbrot í tvær verslanir á höfuðborgarsvæðinu seint á sunnudagskvöld og aðfaranótt mánudags. Verslanirnar tvær eru í Kópavogi og Reykjavík.
Málin voru tilkynnt til lögreglu í gærmorgun en miklum verðmætum var stolið, að því er fram kemur í tilkynningunni.