Félag héraðsskjalavarða á Íslandi hefur útnefnt Svanhildi Bogadóttur, fyrrverandi borgarskjalavörð, og Hrafn Sveinbjarnarson, fráfarandi héraðsskjalavörð í Kópavogi, sem heiðursfélaga.
Viðurkenningin var veitt á haustráðstefnu félagsins í Skálholti.
Svanhildur var borgarskjalavörður í 36 ár en Reykjavíkurborg lagði niður Borgarskjalasafnið í apríl og voru verkefnin færð til Þjóðskjalasafnsins.
Þá hefur Kópavogsbær ákveðið að leggja niður Héraðsskjalasafn Kópavogs og verða verkefnin færð til Þjóðskjalasafnsins.
Bæði Kópavogsbær og Reykjavíkurborg fengu KPMG til að fara yfir stöðu safnanna og var ákvörðunin að leggja niður söfnin sögð tekin í hagræðingarskyni.
Skjalaverðir hafa verið mjög gagnrýnir á ákvörðunina og segja skýrslur KPMG einkennast af einsýni.