Starfið algjör forréttindi

„Þetta er gott tækifæri fyrir ungt tónlistarfólk til að kynnast tónbókmenntunum, auk þess sem hljómsveitin hefur mikla félagslega þýðingu fyrir þau. Hérna eru þau með sínum jafnöldrum að takast á við erfið og krefjandi verkefni,“ segir Gunnsteinn Ólafsson, hljómsveitarstjóri Sinfóníuhljómsveitar unga fólksins, spurður um gildi sveitarinnar sem heldur upp á 20 ára afmæli sitt með tvennum tónleikum í Langholtskirkju kl. 20 á sunnudag og mánudag.

„Þess utan er stjórnin skipuð krökkum úr hljómsveitinni, ásamt mér, meðan ráðuneytið var með puttana í Sinfóníuhljómsveit æskunnar meðan hún var og hét. Þannig að boðleiðirnar eru styttri hjá okkur. Þetta er algjör grasrót byggð á lifandi áhuga. Það eru algjör forréttindi fyrir mig að starfa með þessari hljómsveit,“ heldur Gunnsteinn áfram.

Frumflytja nýtt verk 

Á tónleikunum frumflytur hljómsveitin Þjóðlagasinfóníu eftir Kjartan Ólafsson, Ingibjörg Linnet leikur trompetkonsert eftir Johann Babtist Neruda, sem uppi var á 18. öld, og loks flytur hljómsveitin Gloriu eftir 20. aldar manninn Francis Poulenc ásamt Háskólakórnum og Maríu Sól Ingólfsdóttur sópran.

Gunnsteinn Ólafsson hljómsveitarstjóri. Mbl.is/Ófeigur Lýðsson

Gunnsteinn segir Kjartan hafa komið að máli við sig og lýst áhuga sínum á að semja nýtt verk fyrir þetta tilefni. Það er svo sem engin nýlunda en hljómsveitin hefur frumflutt 21 verk eftir íslensk tónskáld á þessum 20 árum. Sum hafa verið sérstaklega pöntuð, önnur hafa komið til sveitarinnar.

„Stundum hitti ég bara fólk á förnum vegi sem vill semja fyrir okkur verk. Þetta er eins og fljót sem flæðir og ég held að megi segja að hljómsveitin hafi verið íslenskum tónskáldum mikil hvatning; þau finna að þarna er að finna æð til að koma verkum sínum á framfæri,“ segir Gunnsteinn.

Nánar er rætt við Gunnstein í Sunnudagsblaði Morgunblaðsins.