Innlent | mbl | 30.11.2024 | 19:24

Aldrei fleiri utankjörfundaratkvæði

„Verðursveifla“ var í kjörsókn og helmingi fleiri atkvæði greidd í gær en á fimmtudaginn. Morgunblaðið/Sigurður Bogi

Aldrei hafa fleiri utankjörfundaratkvæði verið greidd hjá sýslumannsembættunum í Norðausturkjördæmi þ.e. Norðurlandi eystra og Austurlandi.

Þetta kemur fram í tilkynningu frá sýslumanninum á Norðurlandi eystra en atkvæðagreiðslunni lauk klukkan 17 í dag.

Samtals voru greidd utankjörfundaratkvæði hjá embættunum 6.116 talsins en á kjörskrá í kjördæminu eru um 31.500 kjósendur. Verði kjörsókn 80% má því ætla að atkvæði greidd utankjörfundar kunni að nema allt að 30% greiddra atkvæða.

Veðursveifla í kjörsókn

Segir í tilkynningu sýslumannsins að aukning á Austurlandi sé veruleg og að ekki kæmi á óvart ef utankjörfundaratkvæði mynduðu hærra hlutfall greiddra atkvæða en dæmi hafa verið um áður á landsvísu.

„Veðursveifla“ hafi verið í kjörsókn þar sem helmingi fleiri atkvæði hafi verið greidd í gær en á fimmtudaginn sem teljist óvenjulegt. Það sýni aftur á móti afgerandi viðbrögð kjósenda á Austurlandi og Norðurlandi eystra við veðurspánni.

Kjörstöðum í kjördæminu var fjölgað vegna veðurspárinnar auk þess sem opnunartími var sums staðar rýmkaður.