Guðmundur Gunnarsson, frambjóðandi Viðreisnar í Norðvesturkjördæmi, hefur lagt fram kosningakæru til Alþingis. „Þar er þess krafist að Alþingi úrskurði kosningu allra framboða í Norðvesturkjördæmi ógilda,“ segir í færslu Guðmundar á Facebook.
Eftir endurtalningu atkvæða í Norðvesturkjördæmi kom í ljós að Guðmundur, oddviti flokksins í kjördæminu sem áður mældist inni, tæki ekki sæti á þingi.
„Því meira sem maður kafar ofan í þetta mál því grunsamlegra verður það. Sleifarlagið er svo yfirgengilegt að það verður sífellt erfiðara að fallast á eftiráskýringar. Ég neita til dæmis að trúa því að þaulvönu talningafólki sé ekki treystandi til að telja skammlaust upp á fimmtíu. Aftur og aftur,“ segir Guðmundur.