Stórlax kom á land í Þverá í Borgarfirði í morgun þegar að ensk veiðikona landaði þar fallegum 103 cm hæng.
Það var Annie Outhwaite sem veiddi laxinn á Sunray Shadow túpu í svokallaðri Klettfljótskvörn. Að sögn Egils Kristinssonar, bónda í Örnólfsdal og leiðsögumanns við ána, þá var um harða baráttu að ræða og tvísýnt á tímabili hvort myndi hafa betur í áttökunum. Svo fór þó að Annie náði að landa höfðingjanum sem er stærsti lax sumarsins af Þverár/Kjarrár svæðinu.
Að sögn Egils er enn talsvert af fiski að ganga og lúsugir laxar veiðast á hverri vakt auk þess sem talsvert mikið er af stórfiski víða um ána. Síðasta þriggja daga holl sem lauk veiðum á hádegi í dag landaði 50 löxum á sjö stangir. Það var skipað mjög rólegu erlendu veiðifólki sem fór sér að engu óðslega við veiðarnar og byrjaði seint á morgnana og hættu snemma á kvöldin.
Fram kom hjá Agli að auki að Þverá hefur nú farið yfir 1000 laxa og mjög stutt er í að Kjarrá að nái því þar sem síðasta holl lauk veiðum í hádeginu með 30 laxa á sjö stangir.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |