Talsvert hefur dregið úr veiði í Veiðivötnum samkvæmt upplýsingum frá Veiðifélagi Landmannaafréttar og mun það ekki vera óeðlilegt um þetta leyti sumars.
Fram kemur að yfirleitt dragi talsvert úr veiði um þetta leyti sem stafar líklega af því að nú sé hásumar og því er fæðuframboð í hámarki hjá fiskunum sem í vötnunum búa og erfiðara að fá þá til að taka beitur eða flugur veiðimanna. Þá spilar líka inn í að rólegri veiðimenn eru á ferð, oft fjölskyldufólk sem kemur í öræfakyrrðina til að slaka á og njóta einstakrar náttúru Veiðivatna ásamt því að renna í rólegheitunum fyrir fisk.
Í vikulegri samantekt veiðifélagsins kemur fram að 13.784 silungar hafi veiðst í Veiðivötnum það sem af er sumri, sem skiptast 6.575 urriða og 7.209 bleikjur. Mest hefur veiðst í Snjóölduvatni, 3.893 fiskar og þar á eftir í Litlasjó, 3.383 fiskar. Í síðustu viku veiddust 1.865 fiskar í vötnunum, mest í Litlasjó þar sem komu 643 urriðar á land.
Stærsti fiskurinn er enn þá 12,0 punda urriði sem veiddist úr Hraunsvötnum. Þá er mesta meðalþyngdin 3,7 pund úr Pyttlum þar sem þó hafa aðeins veiðst 28 urriðar það sem af er sumri.
Nánar má kynna sér þessa samantekt hér.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |