Byrjað er að veiðast aftur í Skógaá undir Eyjafjöllum, en hún fór illa út úr eldgosinu í Eyjafallajökli árið 2010 og lagðist veiði þar af um nokkurra ára skeið. Síðustu árin hafa menn reynt að byggja ána upp aftur og virðist það farið að skila einhvejum árangri.
Veiðivefurinn veida.is greinir frá því að veiðin hafi farið rólega af stað í sumar en í ágúst hefur ræst úr henni og hópur veiðimanna sem veiddi á þrjár stangir þar fyrir nokkru landaði 10 löxum á tveimur dögum. Flestir laxanna veiddust við ármót Kvernu og Skógár og komu allir á maðk. Allt var þetta nýgenginn smálax.
Veiðisvæðið sem um ræðir er um 10 kílómetra langt og skiptist í Skógá fyrir neðan Skógafoss sem er um sjö kílómetra langt, auk tveggja kílómetra kafla í Kvernu og rúmlega eins kílómetra kafla í Dalsá.
Veiðin byggist að mestu á sleppingu niðurgönguseiða og árin á undan eldsumbrotunum í Eyjafjallajökli var mjög góð veiði í ánni og veiddust mest í henni 1.537 laxar árið 2008. Síðustu árin hefur áin verið í uppbyggingu og sleppt hefur verið um 30 þúsund laxaseiðum á ári.
Þegar síðast fréttist var búið að skrá 40 laxa í veiðibókina til viðbótar við nokkrar bleikjur.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |