Stórlax á land úr Hrútafjarðará

Stórhængur veiddist fyrr í dag í Hrútafjarðará úr veiðistaðnum Síríus. Þá berast fréttir austan af Héraði að Jökla sé að jafna sig eftir yfirfallið frá því í byrjun ágúst.

Samkvæmt upplýsingum frá Veiðiþjónustunni Strengir þá veiddi Birgir Hilmarsson fyrr í dag hnausþykkan hæng úr veiðistaðnum Síríus sem mældur var 98 cm og ef að líkum lætur er þetta rúmlega 20 punda fiskur.  Ekki kom fram hvaða flugu sá stóri tók. Veitt er út mánuðinn í Hrútafjarðará og eru rúmlega 320 laxar komnir þar á land.

Þá er ennfremur greint frá því að fyrsti laxinn úr Jöklu sjálfri veiddist í morgun frá því hún fór á yfirfall þann þriðja ágúst. Kom fiskurinn á land úr Hólaflúð en áin er nú óðum að hreinsa sig eftir yfirfallið. Verður veitt út september og má búast við góðri veiði þessa síðustu daga veiðitímabilsins þar sem veiðimenn eru að kasta laxa sem að ekki hafa séð neitt agn í sjö vikur. Hliðarárnar sem renna út í Jöklu munu einnig vera fullar af fiski sem hefur gengið upp í þær í rigningunum síðustu daga.

• Blogga um frétt

Seinustu hundraðkallar sumarsins