Tannlæknahollið með 102 laxa

Mögnuð veiði hefur verið í Stóru-Laxá síðustu daga, eins og Sporðaköst greindu frá í gær. Hollið sem þeir Þórarinn Sigþórsson og Egill Guðjohnsen voru í var komið með 86 laxa í morgun eftir þrjár vaktir eða einn og hálfan dag. Þeir félagar hættu veiðum klukkan hálf eitt og voru þá búnir að landa þrettán löxum. Tvær stangir komu í hús laxlausar og segir Egill Guðjohnsen að þá hafi Tóta ekki litist á blikuna og vildi skjótast út og ná í fisk númer hundrað. Ekki kom til þess því að fjórða stöngin kom í hús með þrjá laxa veidda og var þá heildartalan komin í 102 laxa. „Þá var Tóti sáttur,“ sagði Egill í samtali við Sporðaköst.

Þegar þetta holl mætti til veiða var Stóra-Laxá komin í um 400 laxa. Þetta holl jók veiðina um fjórðung og er áin nú komin vel yfir 500 fiska. Lokahollið í ánni hóf veiði seinni partinn í dag og viðbúið að góð veiði haldi áfram. Áin hefur vaxið mikið í vatni í rigningunum en ekki litast. Fróðlegt verður að heyra af framhaldinu.

• Blogga um frétt

Seinustu hundraðkallar sumarsins