Hörkuveiði í Litluá

Veiðimenn sem opnuðu Litluá í Kelduhverfi í morgun hafa verið í hörkuveiði og er fiskurinn vel haldinn. Nokkrir urriðar yfir 70 sentimetrar eru komnir á land. „Þetta byrjar af miklum krafti. Mikið líf í ánni og þegar komnir margir fiskar á land fyrri hluta dagsins. Þegar veiðimenn fóru að sofa í gærkveldi var auð jörð og sunnangola en núna í morgun var kominn jafnfallinn snjór yfir allt og smá hríðarél í hægviðri. Fiskurinn er vel á sig kominn og í flestum tilfellum feitur og pattaralegur,“ sagði Jón Tryggvi Helgason í samtali við Sporðaköst. 

Jörð var auð í gær en þegar veiðimenn komu út hafði jafnfallinn snjór lagst yfir allt. Það truflaði ekki veiðina. mbl.is/Aðsend mynd

Veitt er á fimm stangir í byrjun tímabilsins og eru staðkunnugir menn að veiðum, sem hafa verið með opnunarhollið um margra ára skeið.

Jón Tryggvi sagði að veiðin hefði byrjað með látum, strax í morgun.  Flestir fiskar sem sett hefur verið í hafa tekið straumflugur. Hann var ekki viss um hversu margir fiskar væru komnir á land en sagði að einn veiðimaður hefði áætlað að þeir væru orðnir um fimmtíu talsins. „Það eru nokkrir af þeim mjög vænir og yfir sjötíu sentimetrar að lengd.“

Trausti Hákonarson með sjötíu sentimetra urriða. Hörkuveiði hefur verið í Litluá í morgun. mbl.is/Aðsend mynd

Þegar líður fram á sumar fjölgar stöngum í sjö og er þá leyfilegt að vera með tvær þeirra í Skjálftavatni sem fyllist af bleikju þegar líður fram á vor og sumar.

Jóhann Ólafsson glímir við 68 sentimetra urriða í morgun. mbl.is/Jón Tryggvi

Litluá leggur ekki enda er volgra í ánni. Jón Tryggvi segist hafa séð töluvert magn af fiski í henni í vetur þegar hann var að ganga með henni.

• Blogga um frétt

Seinustu hundraðkallar sumarsins