Veiðimenn láta ekki fannfergi stöðva sig

Fyrsti dagur stangaveiðitímabilsins er í dag. Veiði hófst í nokkrum ám í morgun og létu veiðimenn ekki kafaldssnjó aftra sér að fara til veiða, í það minnsta á SV-horninu. Steingrímur Sævarr Ólafsson var einn þeirra sem tók daginn snemma í Varmá sem rennur í gegnum Hveragerði. „Við eltum snjóruðningstæki yfir Hellisheiðina og vorum byrjaðir snemma í morgun. Fyrstu klukkutímana gekk á með hríðarbyljum en svo fór hann að lægja og það er komið mjög fallegt veður,“ sagðir Steingrímur í samtali við Sporðaköst hér á mbl.is.

Sporðaköst hefja nú aftur göngu sína á mbl.is og verða með svipuðu sniði og í fyrra. Þegar kemur fram á sumar munum við kynna ýmsar nýjungar.

Snjó kyngdi niður í nótt og í morgun og á sumum stöðum vaða menn snjó í hné. En þetta stöðvar ekki þá hörðustu. Aðsend mynd

Steingrímur og félagar byrjuðu á efsta svæðinu og voru búnir að landa þremur fiskum á stuttum tíma. Þetta voru staðbundnir urriðar og einn sjóbirtingur um 35 sentimetrar.

„Já maður lætur sig hafa það þegar er loksins komið að þessu að mæta hvaða veðri sem er. Við erum hér víða í snjó upp í hné en það á ekki að koma neinum á óvart. Það er jú bara 1. apríl.

Þó nokkur veiðivötn opna í dag. Leirá í nágrenni Akraness, Litlaá í Kelduhverfi, Húseyjarkvísla og sjóbirtingsárnar fyrir austan. Veiði hefst einnig í nokkrum silungsveiðivötnum í dag.

• Blogga um frétt

Seinustu hundraðkallar sumarsins