Tími bleikjunnar er runninn upp. Með hækkandi hitastigi kemur hún gjarnan á grynnra vatn í leit að æti. Bleikjan er farin að gefa sig á Þingvöllum, í Hraunsfirði, Úlfljótsvatni og fleiri stöðum. Einn þeirra sem hefur verið iðinn við kolann í vor er Atli Bergmann, ástríðuveiðimaður. Hann var í Hraunsfirðinum í gær og landaði tveimur fallegum bleikjum og varð var við fisk víða. „Ég fór fyrst í Hraunsfjörðinn, sumardaginn fyrsta en þá var ekkert líf að sjá enda vatnshitinn ekki nema tveir gráður. Í gær var allt önnur staða. Þegar vindinn lægði sá maður fisk vaka víða og við vorum að taka bleikjur á hefðbundnar púpur, Pheasant tail, Killer og Peacock svo ég nefni einhverjar.“
Atli hefur stundað Þingvallavatnið af krafti í vor og uppskorið góða veiði. „Ég held að þetta snúist nú oftast mest um ástundun. Þegar flugan er í vatninu eru mun meiri líka á að fiskur taki, heldur en ef hún er heima í sófa eða í bílnum. Það held ég að sé aðal galdurinn í þessu,“ sagði Atli í samtali við Sporðaköst.
Hann segist hafa þá sérvisku að hann notar flotlínu þegar hann er að veiða og það sama á við með urriðann í Þingvallavatni. Hann er með mjög langan kónískan taum. Jafnvel tvær stangarlengdir og þá er einmitt gott að vera með kónískan taum því erfitt getur verið að kasta með svo langan taum. „Stundum getur verið gott að nota þyngri flugu og gefa henni tíma til að sökkva. En mjög gjarnan er hann að taka í yfirborðinu.“
Aðspurður um hvaða fluga hafi gefið honum best í urriðanum, nefnir hann Murtuna sem hann hafi fengið hjá Tomma í Veiðihorninu. „Ég fékk flesta á hana en svo líka á Black Ghost og fleiri flugur.“
Í síðustu viku fór Atli í fjallavatn sem er nokkuð drjúgur gangur í. Hann gefur ekki upp staðsetningu á vatninu en segir að ef menn hafi samband við hann sé hann reiðubúinn að labba með þeim. „Landeigandinn sem ég fæ leyfi hjá vill ekki að átroðningurinn verði of mikill og það ber að virða.“ Veiðin var mögnuð. Eiginlega fiskur á í hverju kasti. „Við lönduðum átján fiskum á fyrsta hálftímanum og þetta var allt bleikja.“
Fastur punktur í vorveiði hjá Atla er að eltast við urriða á efsta svæði Elliðaánna. Þar gerði hann góða veiði í vor. Fékk þrjá stóra urriða yfir sextíu sentímetra og hrakti burt þrjá veiðiþjófa á svæðinu. Framundan eru svo endalausar silungaferðir hjá honum á næstu dögum. Ósasvæði Vatnsdalsár og Laxá á Ásum og Svartá í Bárðardal og fleiri og fleiri ferðir.
Hann býst við góðu laxveiðisumri. „Það segir mér þessi meðfædda og inngróna bjartsýni veiðimannsins,“ hlær hann að lokum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |