Kótelettur og majónes í Dölunum

Kótelettur í raspi, brauðterta af gamla skólanum og urriðar voru í aðalhlutverki í veiðihúsinu Þrándargili á opnunardegi Laxár í Dölum. Veiði hófst í morgun og eru aðstæður einkar erfiðar eins og svo víða með laxveiðiár á Vestur- og Suðurlandi.

Átta urriðar veiddust og sáust nokkrir laxar, meðal annars í Neðri-Kistu, Papa, Þegjanda og Sólheimafossi. Stefán Sigurðsson er einn þeirra sem er við opnunina. „þetta eru virkilega erfið skilyrði og áin er afar lítil. Vonandi gengur veðurspá næstu viku eftir og fer að rigna. Áin þarf nauðsynlega á því að halda,“ sagði Stefán í samtali við Sporðaköst.

Harpa Hlín Þórðardóttir með fallegan urriða úr Dölunum. Hún landaði sex í morgun. Ljósmynd/SS

Hádegismaturinn var ekki af verri endanum. Sara Pétursdóttur eldar ofan í mannskapinn og bauð upp á kótelettur í raspi með öllu tilheyrandi. Þá lagaði Sara magnaða brauðtertu að sögn Stefáns. „Ef einhver kann á rasp og majó þá er það Sara Pétursdóttir.“

Athygli vakti að majónestertan var skreytt alvöru laxaflugum og gátu gestir skorið sér sneið með þeirri flugu sem þótti mest spennandi. Ljóst er að Sara sló í gegn hjá hollinu.

Stefán Sigurðsson sagðist eiga von á því að þegar liði á daginn og sólin hyrfi bak við ský gæti eitthvað skemmtilegt farið að gerast.

Fyrsti laxinn úr Hafralónsá. Veiðimaður er Jón Þór Júlíusson, einn af eigendum Hreggnasa, sem leigir Hafralónsá. Ljósmynd/Hreggnasi

Hafralónsá opnaði í morgun

Hin kyngimagnaða Hafralónsá opnaði í morgun. Fyrsti fiskurinn veiddist fljótlega en litlar upplýsingar liggja fyrir. Nóg vatn er í Hafralónsá og er hún ekki plöguð af þurrkum eins og ár í öðrum landshlutum. Hafralónsá rennur í miklum gljúfrum og er þar mikil náttúrufegurð. Áin fóstrar einnig rígvænar bleikjur og eru þær eftirsóknaverðar fyrir marga veiðimenn.

• Blogga um frétt

Seinustu hundraðkallar sumarsins